Презентация - Н.Н. Куратова

Радейтчöм - сiйö… (Н.Н.Куратовалöн «Куим вожа тополь» повесьт серти)

Муслуныд - збыльысь кö сiйö муслун – Венас кузь туй кост, но тэнö пыр аддзас. Муслуныд – морт моз жö öтиысь чужлö, Муслуныд – олöмад мед сöстöм лача. Муслуныд – збыльысь кö сiйö пöсь муслун – Писькöдчö сьöлöмад дзольгысь ключ горöн, Шондi моз некор дзик, некор оз куслы, Дзоридз моз югыдлань чужöмнас нерö. В.Напалков

Вера зiлис не видзöдны Илья вылö, но ставсö аддзис и ставсö гöгöрвоис: Илья збыльысь кодöскö радейтö и кöсйö ньöбны сылы пöдарки. Но кодi ciйö шуда нылыс, кодлöн киясыс мöдасны кутлыны Ильялысь еджыд да топыд кияссö, шыльöдны гöгылясьöм юрсисö?.. «И мыйла тэ татшöм мича да ласков?»

В.В.Юхнин «Алöй лента» роман

«Галю, тэ кöсйин месянь виччысьны письмöсö, со и гижа. Дасöc нин эськö гижлi да мöдöдныс ог лысьт, косявла да бара выльöс гижа. Ог аддзы кывъяссö гижны, мый думайта. Первой делö кок улöдзыд поклон тэд, и кора прöща кок улад юрбитöмöн. Тэ тöдан менö: мыж вöчтöг ме ог нюклясь некод водзын, а тэнсьыд кора, ог тöд, прöститан он сэсся… Письыд аттьö. Видз сiйöс, миянлысь Петрушаöс. И асьтö тшöтш. Ме ог вермы висьтавны, кыдзи казнитi ачымöс мунöм бöрад…»

Н.Н.Куратова «Куим вожа тополь» повесьт

Пöрт мыськалiгмозыс Елена зэв дыр син бöжнас видзöдiс Миколлысь кельыд югöрöн нюлыштöм чужöмсö, приметитiс сэсь, мый вöлi позьö приметитны том ныв синлы и аслас челядьдырся быдман ёртлы кыдзкö медпервойысь шыасис аслыснога шыöн, аслыссяма кöсйöмöн, мый аслас чужöмыс быдсöн пымавлiс.

П.Г.Доронин «Парма сьöлöмын» роман

Нылыс и меным öд тырмис Машаысь не омöльджык мöд, Сöмын эз ло меысь верöс, Саша кодь тöждысьысь бать… Быттьöкö сöтiсны черöн Сьöлöмысь кутшöмкö прать, Муслункöд кодi на йитлiс Менсьым и олöм и лов… Сашöлысь жугöдiс Гитлер Ныв дiнö сöстöм любов.

С.А.Попов «Машук» поэма

Ме тэ ради му вылас ола Он тöд, кутшöм мусса тэ, дона, Кыдз сьöлöмöй тiпкö, он кыв, Мый тэ ради гажтöмтчö ёна Лöз войвылын öти том ныв, Мый во гöгöр виччысьö тулыс, Шань муыс моз сывлыны мед, Мый дзоридзöн петö лым улысь Да син улад тэныд оз шед. Он тэ менсьым кывзывлы сьылöм, Он тэ орчча кок туйсö таль, Он тэ павкнит пельпомъяс вылам, Ни югыдлöз чышъян, ни шаль. Он тэ еджыд платтьööн пасьтöд, Он тэ нимлун дзоридзсö вай, Кöн тэнсьыд ме лов шытö казьта, Кор лун тöлöн пöльыштас май. Ме виччысьтöм шудлы ог эскы, Ӧд олöмыд – абу на мойд, И некутшöм лун тöв оз веськöд Ныв сьылöмö поздысьöм дой. Но янсöдчöм понда ог кутöй Вай керавны муслунлысь нэм: Ме сiйöн нин овлывла шуда, Мый тэ тайö му вылас эм.

А.Е.Ванеев

Сьöлöмöй нöйтчö менам, ме полiгтырйи вевття аслам киöн Диналысь пöсь кияссö. Сiйö виччысьтöмысла дрöгнитö, но оз нетшышт кияссö; и ми вель дыр тадзи чöла пукалам – войнаöн дойдöм челядь, кодъяс друг казялiсны, мый, сьöкыд кадыс вылö видзöдтöг, тшöтш и на пытшкын пондiсны ловзьыны томлунöн виртö öзтысь вынъяс.

И.Г.Торопов «Регыд дас квайт» повесьт

МАКСИМ. Нэм кежлö öтлаын? Да, Оля! ОЛЬГА. Да, Максим! МАКСИМ. Радейтан? ОЛЬГА. Радейта. МАКСИМ. Ёна? ОЛЬГА. Ёна.

Н.М.Дьяконов «Свадьба приданнöйöн» комедия

Малалö – оз яндысь – тöлыс Юрсисö том аньлысь. Кутшöм любö эськö вöлi Сьöлöмшöрлы – Ваньлы Муса гöтырыскöд гортысь Видзьяс вылö вуджны! Эз ло лишнöй мужик мортыд Эськö страдна уджлы.

В.А.Попов «Сьылiсны бабаяс, сьылiсны»

Сыктыв берегын, карса пляж дорын сулалö ыджыд да ён куим вожа тополь.Уна йöз сы дорö волöны, и быдöнлы сiйö вермö сетны ассьыс вуджöрсö да веж коръяснас ворсöм шысö. Сылöн вож улын позьö дзебсьыны яр шондiысь – кор яйтö ёна нин палитны кутас и жарысла нинöмöн весиг лолавныд; позьö дзебсьыны и сэк, кор виччысьтöг тупъяс лöз енэжсö сьöд кымöр да ведра дорысь моз ызкнитас зэр. А том гозъяö кö воасны ичöтик каганас гожъялыштны, коляскасö быть нин сiйö тополь улас сувтдасны. Кага увтöссö кö ковмас косьтыштны, сылöн вож вылö жö öшöдöны. Да мый и сёрнитны! Лимонад ли ырöш ваясны шойччысьяс сьöрсьыныс, бара жö тополь вужъяс костö сюйöн. Ыркыд сэн, оз шоммы ни оз пöсяв юанторйыс.